Ko Whakaata Māori te whare pāpāho taketake o te motu nei, o Aotearoa, e ū ana ki te whakarauora, ki te whakakaha hoki i te reo, i te ahurea me te tuakiri mā te arapāho. I tāna whai ki te taurima i tētahi taiao e toiora ai te reo me ngā tikanga, ko te whakakitenga nui o Whakaata Māori, ‘kia mauriora te reo’, otirā, ko te anganui ki te anamata e kōrerotia ai te reo i ngā wā katoa, i ngā wāhi katoa.

Ko tā Whakaata Māori he tautoko i ngā mahi tautiaki, i ngā mahi whakatairanga i te reo me ngā tikanga Māori, mā te reo Māori me te reo Pākehā, i āna whakapāhotanga utukore me ngā huapāho matihiko hei toro mai mā te marea, ahakoa te wāhi, ahakoa te wā, ahakoa te pūrere. Ko tā Whakaata Māori he whakangahau, he tūhono hoki ki ngā apataki puta noa i te ao mā te waihanga huapāho e tautoko ana i te ora o te reo me ngā tikanga, e whakatairanga ana hoki i ngā kaupapa rumaki reo, tuku iho i te reo ki ngā uri whakaheke.

I roto i ngā tau, kua rewa i a Whakaata Māori ētahi huapāho e arohatia nuitia ana e Aotearoa, arā, ko: 

• ngā mahi kawepūrongo e pāho ai ngā huihuinga hirahira o te ao Māori
• te whakapāho i te rā mō Anzac me Waitangi
• Te Matatini
• Ahikāroa
• Homai te Pakipaki
• te pāho mataora atu i ngā hākinakina; i ngā rohe tae noa ki ērā puta noa i te ao.

“E kawe nei mātou i te haepapa nui, kia tukua ā tātou kōrero whakamīharo onamata, inamata, anamata ki te ao. He mana nui tō ngā kōrero e whakapāhotia ana e mātou i ēnei rā; he puna mātauranga hoki hei whakaaweawe i ngā tirohanga o te motu whānui, me te aha, he whakatenatena i te āhua o te tiro whakaroto o ā tātou tamariki ki a rātou anō, me te ao hurihuri hoki e titiro mai ana ki a rātou. Ko te takatū ake ki te karanga o Ngā Tohu Reo 2024 tētahi o ngā kaupapa maha e rangatira ai ngā kōrero tuku iho a te iwi”, te kōrero a te Kaihautū, a Shane Taurima.

Ko mātou o Whakaata Māori tētahi o ngā hoa kōtui i Te Whare o te Reo Mauriora, i tautoko i Ngā Tohu Reo Māori i roto I ngā tau, hei whakamana i ngā mahi me ngā kaupapa reo a Ngāi Kakari mā e whai nei kia māhorahora, kia toiora hoki te reo Māori.