Sonny ki Te Tiri o te Moana
I tēnei kiriata ka whakaatuhia e Sonny Ngatai ētahi mea i ākona e ia ki Te Tiri o te Moana (Antarctica). He iti noa iho ngā tāngata ka whiwhi i te hōnore nui kia haere ki Te Tiri o te Moana, ā, ko te nuinga o te hunga ka whai wāhi ki tērā momo haerenga he kaipūtaiao, he kairangahau rānei. Kore rawa a Sonny i whakaaro ko ia tētahi o ngā tangata ka tae atu ki tērā whenua autaia. Nō te tau 2019, i runga i te karanga a TVNZ ki a Sonny kia tū hei kaikawe reo mō tā rātou hōtaka a Science on Ice, ka tae atu ōna waewae kai kapua ki Te Tiri o te Moana. Mātakitaki mai kia kite koe i te mīharo o te whenua motuhake nei.
Mō Sonny Ngatai
I kuraina a Sonny ki te kāreti o Hato Pāora, i reira ka uru atu ia ki ngā whakataetae Manu Kōrero ā-motu. Mō ngā tau e rua, 2013 me 2014, ka eke a Sonny ki te panekiretanga o ngā tohu whaikōrero mō tōna reanga, ka tohua ko ia te toa whakaihu waka mō te wāhanga Korimako. Mutu rawa te kura, nā tōna ngākaunui ki te reo Māori me tana kaha whakaohooho i te hunga rangatahi, ka karangatia a Sonny ki te mahi kaikawe reo mō te hōtaka tuatahi e aronui ana ki te rangatahi Māori, arā, ko Hahana.
Kua rongonui a Sonny mō āna kiriata e whakamāhukitia ana ngā ingoa tika, Māori nei, mō ngā wāhi puta noa i Aotearoa - ko tana whāinga kia ūkaipō anō ngā ingoa wāhi Māori i Aotearoa. Nā wai rā, ka whai wāhi ia ki ngā hōtaka maha pērā i a Tiki Towns (Nickelodeon, NEON, Sky Go) me Science on Ice (TVNZ). Ahakoa e rangatahi tonu ana a Sonny, kua tae atu ia ki Tahiti, Amerika, Dubai, Parīhi, me Te Tiri o te Moana mō āna mahi pāpāho. E ai ki a Sonny, ko te reo Māori te take.
Hononga whaipānga:
- Te Kiriata o Sonny
- Science on Ice (TVNZ)
Kāti, ko tā He Muka he whakaputa kōrero ki te reo Māori. Ko ngā tirohanga, whakaaro rānei kei roto i te tuhinga nei he mea whaiaro nō te tangata nāna te kōrero i tuhi. Ka mutu, kāore i te whakaatu i ngā whakaaro o, i ngā kōrero a, rānei, Te Taura Whiri i te Reo Māori, āna kaimahi, tana pae whakahaere, tana poari rānei, tae atu rā ki ngā tari, ngā pakihi rānei e whai pānga ana ki Te Taura Whiri i te Reo Māori, ahakoa te hononga, hāunga i ngā mea kua āta whakahuatia ake ai. Ehara ēnei tirohanga, whakaaro, kōrero rānei i te mea whakaiti, whakahē rānei, i te iwi, i te hapori, i te rōpū, i te tari, i te pakihi, i te tangata rānei.