He oranga nui
He oranga roa
He oranga tinana
He oranga hinengaro
He oranga wairua
He oranga whānau

Koia nei te tūāpapatanga o tō mātou tira haere.

Me he rite ki te kakenga o Tāwhaki ki te toi ahurewa, e pēnei ana te kakenga o O.R.A ki tua o angitū, ki taumata kē atu. Ahakoa he tira hou, ka noho hūmārie tonu te tira ā haere ake nei. Koinei te wawata nui o O.R.A ā ngā tau e kainamu mai nei.       

I tīmatahia tō mātou ara hīkoi i te Rotorua nui a Kahu, nō Rotorua kē te nuinga o mātou nā i toko ake te whakaaro i taua wā o te noho mohoao tuatahi, i te tau 2020 kia whakaritea he pēne. Mai i taua wā ki tēnei wā kua wehe atu ētehi, kua peka mai ētehi mema hou, ko te mea nui ko te whanaungatanga, ko te aroha ki te ao puoro hoki.

Hei te 10 ō Tīhema ka puta ki te whai ao ki te ao mārama te kōpae puoro tuatahi o Origin Roots Aotearoa.

Roa kau ana te tira nei e tatari ana ki te whakatakanga o tā rātou kōpae puoro tuatahi. Ko Light of Music te ingoa o te kōpae puoro, kua tapa ki te ingoa o tētahi o ngā waiata o roto i te EP nei. Ko ētehi o ngā waiata e hāngai ana ki ngā take auraki o te wā, kua kitea e te tira hou nei. Kotahi tau mātou e whakarite ana i ngā hua o ēnei waiata. Ahakoa te nui o ngā mahi i roto i te kotahi tau, kei te kitea ngā hua. 

Kātahi te tau hua nui, hua roa ko tēnei. E rua ngā waiata takitahi i uru atu ki ngā pae waiata whā tekau. Ko tō mātou waiata takitahi Māori ko ‘Tuakiritanga’ i eke ki te tuangahuru i runga i ngā pae waiata o Aotearoa. E rua ngā tira hou i taua taumata, a, ko O.R.A tētahi. Ko ngā kaiwaiata rongonui i taua pae taumata, ko Rob Ruha rātou ko Stan Walker, ko Sonz of Zion. I whakawhiwhia hoki e O.R.A he taonga whakaharahara i ngā tohu waiata Māori i tēnei tau tonu. Nō mātou kē te maringa nui. Kua ūpoko pakaru rā anō mātou, ināianei kei te kitea ngā hua. Ko te awhero nui o mātou, ka kaha ake te whakatakataka i te ara kua parangia e mātou, kia eke ki taumata kē atu. Kia mihia ō tātou whānau, ā tātou tamariki. Ngā hoa maha kua ū mai i te tīmatanga. E kore koutou e wareware nei i a mātou. Ki ngā kaiwhakarongo nō ngā tōpito maha o te ao. MIHI NUI, MIHI NUI, MIHI NUI. Kāore he mihi nui ake i te MIHI NUI!     

He aha te pae tawhiti mō O.R.A?

I tēnei wā, kua tīmatahia te whakangungu i tā mātou kōpae tuarua hei te tau, te haere ake nei. Ka tino kitea te whārahi o ngā momo tāera ka puta i a mātou. Koinei te kakenga i kōrerotia. He kakenga mutunga kore. Koinei te tira hou, tēnei haramai nei.

Kāti, ko tā He Muka he whakaputa kōrero ki te reo Māori. Ko ngā tirohanga, whakaaro rānei kei roto i te tuhinga nei he mea whaiaro nō te tangata nāna te kōrero i tuhi. Ka mutu, kāore i te whakaatu i ngā whakaaro o, i ngā kōrero a, rānei, Te Taura Whiri i te Reo Māori, āna kaimahi, tana pae whakahaere, tana poari rānei, tae atu rā ki ngā tari, ngā pakihi rānei e whai pānga ana ki Te Taura Whiri i te Reo Māori, ahakoa te hononga, hāunga i ngā mea kua āta whakahuatia ake ai.  Ehara ēnei tirohanga, whakaaro, kōrero rānei i te mea whakaiti, whakahē rānei, i te iwi, i te hapori, i te rōpū, i te tari, i te pakihi, i te tangata rānei.