Manu Kōrero 2021

Matariki Black, Taarewa-i-te-rangi, Aria Kōmene, Te Atahaia Durie

 

Kua hārewa ake anō te manu i tāna kōhanga

Ka nui kē noa atu ngā pānga kino o te Mate Korona nō te tau 2020, ā, e ngaua tonuhia nei ki te motu whānui, ki ōna kokona horopaki katoa. Whakapā rā anō te ngārara nei ki te Manu Kōrero 2020, me te aha, i whakakorehia atu te whakataetae ā-motu mō te tau 2020.

Mai iho, nō hea tēnei manu i whakawhenua iho, nō reira ka whakatau horokukū te komiti whakahaere ā-motu kia moea te manu ki tana kōhanga. Ahakoa he whakatau uaua tonu nei e ao kē ana hoki tēnei whakatau.

Heoi anō, kua hārewa ake anō te manu i tana kōhanga hei whakarongotanga, hei mātakitakitanga, hei whakatenatena atu anō i ngā taringa pīkari o ngā ākonga o tēnā, o tēnā whaitua o te motu.

Nō te 11 o ngā rā o Pipiri ka whati mai te ngaru ākonga me ōna mātua ki te whakataetae ā-rohe ki te whaitua o Manawatū/Horowhenua. Ka tū ai te whakataetae ā-rohe nei ki te Kāreti o Kuini Irihāpeti ki roto i Te Papaioea.

Nō roto i ngā tau kua kaha te wikitōria a tēnei whaitua ki te atamira ā-motu, ā, hei te Hereturikōkā ka hārewa ake anō ai te Manu Kōrero ki te whakataetae ā-Motu ki tēnei whaitua tonu, ki roto i Te Papaioea.

Ko Leon Blake tētahi o ngā ākonga o Kuini Irihāpeti i ngā tau iti o te iwa tekau i toa ai ā-rohe otiia, nā te orua tonu o te whakawhānau pēpē a tana hoa, kāore ia i tae ake ki te whakataetae ā-motu. I tēnei korenga ka whakakīia e Kingi Kiriona tōna tūranga, me te aha, toa ai a ia ā-motu nei.

Heoi anō, ka tū ngā kaikōrero o tēnā, o tēnā kura o Manawatū/Horowhenua kia kitea ai te toa i roto i ngā wāhanga e whā ka whakataetae atu ai ki te motu whānui hei te Mahuru e haere ake nei.

Kāti, ko te reo o ngā ākonga i rangona, i whakaoreore, i whakatenatena i te hunga whakarongo, mātua mai, kaiako mai, ākonga mai. Ā, i tino eke te kounga o ngā whakaaro otiia, te reo Māori me te reo Pākehā hoki. Ahakoa, ka heke te tokomaha o ngā kaikōrero nō ngā tau ki muri, i kounga noa ake ngā reo e rua nei ka rangona. Ko tēnei whakaaro tonu i puta ake i te kaiwhakawā o Pei Te Hurunui, a Pita Savage ka mea –

 

‘ahakoa tokoiti te hunga kaikōrero i te tau nei, kua eke taumata tonu ake te reo nō tauhounga i tērā tokoiti.’

 

Nā, koia tonu te wero nui ki te motu whānui kia whakarahi ake te hunga kaikōrero, tae rawa ki te wāhanga reo Māori mō ngā tuākana, arā, ki te wāhanga o Pei Te Hurunui kei konei te tino angiangitanga.

Heoi anō, tau ana te reo o ngā ākonga, ā, pēnei tonu pea te hunga whakarongo he pakeke kē e tū mai ana ki te kōrero, nā te rere, nā te tika, nā te tau, nā te Māori ake nei o te reo.

Kāti, ko te tihi o te whakataetae nei ko ngā kōrero tene, ā, whakarauika atu ai ngā kura katoa ki te wāhi kotahi, ki roto i te wharenui o te Kuini Irihāpeti kia whakarongo haere ai ki ngā kōrero tene.

Tīmata ai ki te reo Māori, ka whai iho ai ko te reo Pākehā, ā, haere pēnei tonu ki tōna mutunga iho. He wā ka pakaru mai te katakata o te wharenui i te kōrero kakama, i te kōrero hātakehi. He wā anō ka tino taringa pīkarikari atu ki te kōrero rētō, ki te kōrero taumaha heoi anō he aronui nō te katoa i ngā wā katoa nā te arero koi o ngā ākonga.

Mutu kau ngā kōrero tene, ka whakarite mai te atamira ki te tuku taonga, ki te karanga i ngā toa mā rātou hei whakakanohi i te rohe nei.

Ka taki noho ngā kaiwhakataetae katoa ki te atamira, he whanga whakaneinei, he whanga āmaimai te noho o ngā ākonga.

Ka tū ake te tiamana o ngā kaiako reo Māori o te rohe, a Nic Fonotoe ki te whakaingoa i ngā toa o te rohe. Koia ēnei e whai ake nei:

 

Pei Te Hurunui:           Tārewa-i-te-rangi, i te kura o Mana Tamariki

Te Korimako:               Matariki Black, i te kura o Manu Kura.

Rāwhiti Īhaka:             Te Atahaia Durie, i te kura o Mana Tamariki

Tā Turi Kara:                Aria Komene, i te kura o Manu Kura.

 

Nō reira, ki te hoe, e kare mā. He mahi tonu kei mua i te aroaro hei whakakoi ake, hei whakapaipai ake pea i ngā kōrero, ā, whakapono rawatia ana e te hunga nei ka taea e te atamira ā-motu te pīkau, te whakatutuki.

Ka tika me mihi ki ngā uri, ngā ākonga ka tū nei ki te whakatakoto whakaaro ki mua i te minenga makiu. He momo tangata anake tēnei mahi e taea ana te pīkau, te whakatutuki, ā, ahakoa tuawhā, tuatoru, tuatahi mai rānei te tūranga, kua whakairo kēhia e te hunga nei tō rātou huarahi ki tua, arā, ko tōna taunga ki te ao o te angitū, ahakoa he aha te horopaki.

Hei te Mahuru e haere tata ake nei ka tū ai te whakataetae ā-motu ki Te Papaioea nei, tēnā, ā, taihoa ake nei, wai ka hua, wai ka tohu...

 


Kāti, ko tā He Muka he whakaputa kōrero ki te reo Māori. Ko ngā tirohanga, whakaaro rānei kei roto i te tuhinga nei he mea whaiaro nō te tangata nāna te kōrero i tuhi. Ka mutu, kāore i te whakaatu i ngā whakaaro o, i ngā kōrero a, rānei, Te Taura Whiri i te Reo Māori, āna kaimahi, tana pae whakahaere, tana poari rānei, tae atu rā ki ngā tari, ngā pakihi rānei e whai pānga ana ki Te Taura Whiri i te Reo Māori, ahakoa te hononga, hāunga i ngā mea kua āta whakahuatia ake ai.  Ehara ēnei tirohanga, whakaaro, kōrero rānei i te mea whakaiti, whakahē rānei, i te iwi, i te hapori, i te rōpū, i te tari, i te pakihi, i te tangata rānei.