Hinga atu, hinga mai

Ka taea te aha, atu i te tangi, i te maumahara ki a rātou me tā rātou i takoha mai ki te ao hei taonga nui whakaharahara ā haere ake nei.

E hia nei rātou, te hunga kua kaha hāpai ake i tō tātou reo i ngā tau maha kua heke iho, a, kua huri ināianei ki tua o te ārai i tēnei tekau mā rua ki te tekau mā ono marama kua pahure ake nei. Ahakoa, taku māharahara kei wareware i a au ētahi o taua hunga, e tika ana kia whakahuatia mai ētahi o rātou i tino whai wāhi mai ki ngā mahi a Te Taura Whiri i te Reo Māori me tō tātou kaupapa whakatairanga i te reo Māori hei reo kōrerorero o ia rā, o ia rā.

 

Lee Smith

Kāore i tua atu, kāore i tua mai i tēnei tohunga mō te karawhiu kōrero koi, whakaputa whakaaro hāngai tonu.  He matatau a Lee ki ngā momo āhuatanga e hia nei?  Ko ngā reo o whenua kē, arā, o Rūhia, o Wiwi, waihoki, he toa kauhoe ki Ngā Taumāhekeheke o te Ao Takatāpui. 

Heoi anō, he tohunga a Lee ki ngā mahi wetewete reo, nō reira, i tīkina atu ia hei kaimahi ki Te Taura Whiri i ngā tau mātāmua o te rautau rua mano.  Ko ia te Pou Reo Matua o te tari mō te hia tau, ka mahi, ka wehe, ka hoki mai, ka mahi anō.  Ko tētahi o āna mahi he whakahaere i ngā akomanga whakangungu, whakamātautau i ngā kaiwhakamāori ā-waha, ā-tuhi.  Kua hia nei te hunga i hinga i te koi o te mata o tōna arero, e hia kē anō i rewa ake i āna akoranga, āna tohutohu, e hia anō i eke panuku i roto i ngā whakamātautau, nā runga i te pai o āna mahi whakaako?

Nō te marama o Hūrae 2019 ka wehe ia i tana mahi i te tari, kia pai ai tana hāereere haere ki Hapani, he moemoeā nui tērā ōna. Nō tōna hokinga mai ki Aotearoa i whakawhiwhia ia ki te Tohu Nui o Ngāti Kahungunu, ā, nō muri tata mai ka hinga, ka whakahokia atu ki tōna ūkaipō. Ko te momo i a Lee, me uaua ka kitea. He tangata tū kaha, mō tōna reo, mō tōna takatāpuitanga, mō ōna hoa, mō tōna whānau.

Chur ba! Ko te wawata nui he reka te wāina whero i te kāinga tūturu mō te tangata.  Moe mai rā, e te hoa, i te moe te whita, te moe tē rea, te moe tē whakaarahia.

 

Huirangi Waikerepuru CNZM

Haere rā e hika, koutou ko ō mātua
Unuhia te rito o te harakeke
Ka tū i te aroākapa
Aku nui, aku rahi e
Aku whakatamarahi ki te rangi e
Waiho te iwi, māna e mae noa

Mapu kau ana te iwi i te hinganga o te matakite, o te ihorei, o te urungi e kore rawa nei e warewaretia, a Tākuta Huirangi Waikerepuru CNZM.  Ko tōna wawata, ko tētahi ao he reo ora, he reo kōrero o ia rā, o ia rā, tōna taonga whakahirahira, tō tātou reo Māori.  Nāna te kaupapa mō te reo Māori i kōkiri ki te kāwanatanga o te wā, i pakanga ia i te pakanga nui ki te Karauna, Wai tekau mā tahi, kia whakamanatia ai te reo Māori hei reo whai mana ki Aotearoa, ka mutu, nāna te kaupapa i poipoi, i tautoko mō te 70 tau te roa. 

Nā tōna matakite, me tana pūmau ki te kaupapa kua hua mai ai ngā mea māori noa iho nei ki a tātou, Māori kōrero Māori mā, i ēnei rā, pērā ki te rongo i te reo i runga i te reo irirangi, i runga rānei i te whakaata, ki ngā Ture Reo Māori o 1987 me 2016, tae noa atu ki te reo i roto i ngā kōti, i ngā tari kāwanatanga.

Nō mātou te whiwhi i tāna whakapeto ngoi.  He toka tū moana tēnei mumu reo o Taranaki whānui, i titiro whakamuri, kia haere whakamua ai.  Ko te taonga tuku iho i waiho mai ai e te pou here reo, pou here tangata, mau tonu, mau tonu, haere ake nei, haere ake nei.

“Ka tanuku, ka tanuku, ka tanuku te tihi o te maunga tipua, ka tanuku”

“Ko tōku taonga, ko tōku reo. Ko tōku reo, ko tōku taonga.”

 

Hūhana Royx

Nō te marama o Mahuru 2020 ka riro a Hūhana Royx ki te kāpunipunitanga o ngā wairua, ki Paerau.

I tupu ake a Hūhana ki Te Teko, nō te whānau nui, nō reira tana mōhio ki te whakahaere i te tangata. Nā tōna koi tonu i tukuna ia kia kuraina ki Te Kura Kōtiro o Kuini Wikitōria ki Tāmaki Makaurau, kātahi te māra whakatupu rangatira Māori ko tērā. 

He wahine toa i whakatipuria ki te whakahaere, ahakoa te momo whakahaere.  Whakahaere tangata, whakahaere kaupapa, whakahaere tamariki, i āta poipoia ia ki te mahi ki te pae whakahaere.  He nui tōna aroha ki te mātauranga kōhungahunga, he whakapono hoki tōna ki ngā hua o te mātauranga, oti rā, o te mātauranga Māori me ngā rongoā e ahu mai ana i te mātauranga Māori. Nō reira e hia nei ōna tūranga ki taua ao, ki te ao kāwanatanga anō hoki. Nō te tau 2007 i tīmata ia ki tōna tūranga hei Pou Whakahaere Matua o Te Taura Whiri i te Reo Māori. Ko ia te wahine tuatahi ki te whiwhi i taua tūranga. 

I ngā tau tata nei ko ia te tumuaki o Te Whare Oranga o Te Aitanga o Hauiti, me te Peretana o te pekenga o Ngā Wāhine Toko i te Ora ki Te Tairāwhiti.  Kua whakarērea mai ko ana tamariki e whā, me āna mokopuna.

He tino wahine i whakapau kaha, ao te pō, pō te ao.  E hine e hoki ki Pūtauaki maunga, ki Rangitaiki awa, e moe, e moe, whakaoti atu rā.

 

Toni Waho

Ngāti Rangi, Te Ati Hau-Nui-ā-Pāpārangi, Ngāti Apa me Ngāti Kahungunu

Kua hinga te toka tū moana e āki ana i ngā ngaru o te reo Ingarihi e pae mai ana ki uta...

Nō te marama o Hune, Pipiri, 2020 ka hinga tēnei toa reo Māori. Neke atu i te tekau tau ka noho a Toni hei Tumuaki o Te Kura Kaupapa Māori o Mana Tamariki. Kua hia tau a Toni e pakanga ana kia ora mai ko tō tātou reo tūāuriuri, whāioio.

I tūtaki māua ko Toni ki tētahi o ngā kura reo a Te Taura Whiri i te Reo Māori i te tīmatanga o ngā tau iwa tekau.  I reira rāua ko tana tamāhine a Hinurewa e tākaro ana i te tēnehi.  Taku whakapae, āhua 6-7 pea ngā tau o Hinurewa i taua wā.  Taku kuhunga atu ki te papa tākaro, tere tonu te kī mai a tēnei tamaiti noa iho, “kāre e pai te kaipaipa.  Pai ake pea tō kore kaipaipa matua”, tūmeke katoa au, ehara i te mea i tana kōrero whakahē i taku mahi, he tika hoki tāna, engari i te pai o te rere o tōna reo(me te mea i kī ‘matua’ ki a au, kua waia ki tēnei āhuatanga ināianei), he āhuatanga hou ki a au i aua rā.  Ko te take i reira ahau he whakahaere i te taha whakahaere o te kura reo, he ako hoki i te reo Māori, nā whai anō i mataku au i te tamaiti maringi noa mai ana te reo i tōna waha. Wai ka hua, wai ka tohu ka whai au i te tauira nāna i whakatakoto mai mō te whakatipu i āku ake tamariki kōrero Māori. 

Nō muri mai, i tino kite au i te ū o Toni ki te kaupapa whakaora i tō tātou reo, nāna hoki taua aroha nui ki te reo i whakatō ki roto i ana tamariki, āe, āna tokorua ake, me te tini anō o ngā tamariki i tatū atu ki taua kura, ki tō rātou kōhanga hoki. Ehara i te mea i whāngai noa iho a Toni i te reo, engari, i whāngaia hoki aua tamariki ki ngā momo āhuatanga o te mātauranga, o te hākinakina, o reo kē anō hoki. He rite ō rātou reo ki tō Hinurewa reo, he tika, he mea rere, he Māori.  Ko tā rātou i taua wā he whakapakari i te reo o te whānau katoa, mā ngā akoranga, ngā hui, me ngā wānanga.  I tae atu au ki tētahi hui i whakatūria e Toni mā e kōrero ana mō ngā mahi whakaora ake i te reo Māori, me tā rātou whakapono ki ngā kōrero a ngā tohunga Pākehā o te ao whakaora reo, e kīia ana “kua mate kē tō tātou reo Māori”.  Engari ki a ia, ki a rātou a Ngāi Mana Tamariki mā, e kore te reo e mate i tō rātou hapori.  Ko tā rātou he whakatipu i te hapori reo Māori kia ora tonu ai te reo ki reira haere ake nei, haere ake nei.  Me tā rātou hiahia ki te whāki atu ki te motu whānui, me pērā hoki koutou.

He kaiako, he mātua, he pāpā, he tohunga, he kaihākinakina anō hoki. Ko ngā taonga, ko ngā akoranga, ko ngā mātauranga kua whakarērea mai nei e koe, e kore rawa e warewaretia.  

Ki a koutou te whānau pani, Penny, Hinurewa, Peehi, ahakoa kei tua o Paerau, kāore i tua o maumahara, ka ora tonu a Toni, i a koutou, i a tātou, i āna mahi katoa.

Haere, hoki atu ki ō maunga, ki ō wai, ki ō mātua, tūpuna i te pō e...  e moe, e moe, okioki.

 

COVID-19

Ko ngā kōrero me ngā whakaaro e whai ake nei nā Tā Tīmoti Kāretu i tuhi e hia tau ki muri ki tētahi tuhinga tawhito o He Muka (Putanga 11(1) Raumati 1998).  Kua tāngia anōtia hei mihi ki te tini me te mano kua hinga i te weriweri mate urutā nei te Mate Korona.  Ahakoa, i hinga mai i Aotearoa nei, i hinga atu ki tāwāhi, ahakoa nō hea, ahakoa ko wai, mā te waiata nei rātou e kōpaki.  E kī ana te kōrero kua mihia rātou, kua tangihia, nō reira, ka āpiti hono tātai hono, rātou te hunga mate ki a rātou.  Ka āpiti hono, tātai hono, tātou te hunga ora ki a tātou. Tēnā koutou, tēnā koutou, puta ki te whaiao, ki te ao mārama.

Tihei Mauriora!

 

Kua tāpiri atu tēnei hei tangi ki a rātou kua riro ki te kāpunipunitanga o ngā wairua, i Paerau i ngā tau, i ngā marama, i ngā rā tata kua pahure ake nei.  

E koutou, e te aumangea
Kei hea koutou hei āki i ngā hau kino o te wā?
I te wao tapu nui a Tāne, urutapu ana, ururua ana
Matomato ana te tipu mai o te kahikātoa, o te tōtara haemata
Nō te hinganga, tūpapahū ana te whenua
Ka kore koutou kei hea he taunga mō te
manu kaewa?

Kurupākara ana tērā te māra a Tāne
I te pekī, i te tīhau a ngā manu
Kua kore nei i tiu, kua kore nei i topa
Kia pātai noa ahau, kei hea aku manu tīoriori, aku manu taki, aku manu tāiko i te kāhui
E pōkaikaha nei, e hūrangi nei?
Tērā pea me kapo ko te mahara, me kapo ko te kupu
Mā reira e tū mai anō ai he māhuri, he haemata
E tiu anō ai, e korihi anō ai
Ngā manu o te wao. 

Kāti kei aku raukura,
Kei aku piki kōtuku, kei aku hou amokura
Koutou, te mūrau a te tini
Koutou te wenerau a te mano
Ngā puna o te kī, ngā whakaniko i te kupu
I tutū ai a puehu, i puta ai a whakaaro
I oho ai a mauri, i tau ai a mauri
Nei rā te wao tapu ka nguengue, ka whakarotau
Te whenua ka mōwai 

Aue! Kia tīoriori noa mai ko te manu
Kia kōkī, kia ketekete anō ko te kākā
Kia korihi mai anō ko te kōparapara, i te
pūaotanga o te rā.
Te tangi kau nei taku/te mapu.

I ahu mai i: He Muka: Putanga 11(1) - Raumati -1998

 

He waiata tēnei i titoa hei mihi, hei tangi, hei poroporoaki i ngā mate tāruru nui o te ao Māori. Ahakoa nō te tau 1994 i hakaina tuatahitia ki ngā taumāhekeheke matua o te motu i tū ki Hāwera i taua tau rā, e hāngai tonu ana ngā kupu.

Me tino puta he mihi ki te kapa o Tū-te-maunga-roa nā rātou nei te rangi, ā, nā rātou nei hoki i puta ai te waiata nei ki te whai ao, ki te ao mārama. Ko ngā kupu e rārangi nei ko ngā kupu ake nā Tū-te-maunga-roa anō i āhua whakarāpopoto kia eke ai ki tā rātou i whakaaro ai, i hiahia ai.

Ko ngā kupu whakataki, whakamārama i te waiata nei i te putanga tuatahitanga i pēnei:

Me kī, he waiata tangi tēnei mō ngā kaikōrero whai mana o te ao Māori, arā, a Tā Kīngi, a Mōnita Delamere, a Māori Marsden, a Pumi Taituha, a Hamu Mitchell, a Hōhua Tūtengāehe, a wai ake, a wai ake. Ko ēnei i mōhio nei ki te rāwekeweke, ki te huri, ki te whiu, ki te whakatakoto i te kupu, kua kore haere i kitea tērā momo i roto i te ao Māori o ēnei rā, nā reira ka haku noa te ngākau ki tērā āhua. I roto anō hoki i te haku, ko te tūmanako me kore noa pea e tūpono ka tū mai anō taua rite i roto i ēnei reanga e kaha nei te whai mai.

Heoi anō i tēnei tau, i te tau 1997, i tino haukerekerea te ao Māori e Aituā, ā, riro atu ana te hahua noa atu o te tangata rongonui, rātou ngā kaitārai, ngā kaiurungi i te waka o te ao Māori. I tēnā iwi anō ōna mate rongonui, i tēnā iwi anō ōna, engari ko ētahi o te hunga i hau nei ngā rongo ki ngā tōpito o te motu ko ēnei: Ko Matiu Rata, ko Te Kuru-o-te-marama Waaka, ko Te Ūpoko Ariki o Ngāti Tūwharetoa, ko Tā Hepi Te Heuheu, ko Riripeti Murchie, Tumuaki o Te Rōpū Wāhine Māori Toko-i-te-ora i tōna wā, ko Emily Schuster, ringa kakama o roto i te whare pora o Hine-te-iwaiwa, ko Tā Mokonui-ā-rangi Bennett, Tumuaki o Te Kōhanga Reo, ko Tuaiwa Rickard. Kāore nei i hoki i te waewae tūtuki, me wai atu, me wai atu.

Kāti, ko tēnei te momo tangata e tangihia nei e te waiata nei me te pātai kei hea rā koutou e te aumangea, koutou te hunga kaha, hunga pakari, koutou ngā toka tū moana. Whakaritea ana rātou i te wā o te oranga, ki te ngahere e kapi ana i te rākau e āhei ana te manu ki te tau atu ki reira pae mai ai. Nō rātou ka hinga kua kore he taunga, he paenga mō te manu nō reira me aha kē te manu? Ko te manu he kupu whakarite mō te mātātahi o te ao Māori e tono whakamāherehere ana i te aumangea, arā, i te hunga mātau, i te hunga mārama, kia mōhio ai me huri pēhea, me rere ki hea, me tau anō hoki ki hea. Kāti, i momoho ai e kī ana ō tātou tīpuna, ka ao he rā, ka tō he rā, mate kāinga tahi, ora kāinga rua, ka pū te rūhā, ka hao te rangatahi, aha atu, aha atu. Katoa ēnei kōrero he kōrero whakatītina, he whakahau kia whāia e ō muri mai whakapaparanga kia eke panuku tēnā kaupapa, tēnā kaupapa, e kī nei hoki te waiata, 

 

Tērā pea me kapo ko te mahara
Me kapo ko te kupu.

Ahakoa pēhea ka tangi kau tonu te mapu ki a rātou
kua riro ki te wahangūtanga o nunui mā, 
o roroa mā
engari mēnā tātou ki te aro ki
tā 
rātou i kī ai, i tohu mai ai, ka riro mā te pērā,

E tū anō ai, e korihi anō ai
Ngā manu o te wao.